شعر مساعد الرشيدي مكتوب

إن الشاعر مساعد الرشيدي هو شاعر سعودي الجنسية راحل، ومن أشهر شعراء العصر الحديث في المملكة العربية السعودية والخليج العربي، إذ يمتلك الرشيدي العديد من القصائد المميزة، وغنى له أشهر المغنين العرب كأحلام، ومحمد عبده، وعبد المجيد عبد الله، وعباس إبراهيم.

شعر مساعد الرشيدي مكتوب

فيما يلي بعض القصائد للشاعر مساعد الرشيدي:^[1]

• قصيدة مدي يدين:

مدّي يدينٍ عاهدتها يديّا

ياللي سماك ملبدة برق وغيوم

لا تشتكين اللوم وأنا هنيَّا

أنا هنيّا لأجل ما يلحقك لوم!

ياللي جبينك من غلاه الثريا

ما عاشرت شمسٍ ولا خاوت نجوم

إن كان ما جتني عليك الحميّا

ما عاد لي في باقي العمر ملزوم

ما فزّ قلبي للنواعس كذيّا

إلا يبي يصبح عوضها عن النوم

نامي وخلي كل همٍ عليّا

مالله خلق هالجفن لسهاد وهموم

لا تندهيلي واصلٍ لك بليّا

لو نكسر قلوبٍ ولو نزعل خشوم

قام يتعَزْوا في حديّا حديّا

يوم انحدر دمعٍ عن الذل محشوم

راسي خلق بالطايلات يْتفَيَّا

وخدّك تفيّا بالهَدب جعله القوم

كان الذي في خاطرك ما تهيّا؟

ماني ولد عودٍ كفَخ وابعد الحوم

• قصيدة كبوة حصان:

لا عاد تنشد ما بقى عندي علوم

كل العلوم المبطيات تخبرها

ما جيتك اشكي ميلة الوقت مزحوم

نفسي ليا ضاق المدى ما اخسرها

ياصاحبي كنت امس كنت امس محشوم

واليوم هج بجيتك واختصرها

خلك بعيد ابعد من العام لليوم

وادنى من احلام النجوم وقمرها

بعض الكلام اللي تحليه مسموم

وما كل كف صافحتك تغدرها

كم طيب ساقته الاقدار لرخوم

ويا كثر ناس تنخدع في صورها

والحر ما يشره على خنعة البوم

الله رفع شانه ووطا قدرها

لو جيتني كنك على الوجه ملطوم

بعض الخطايا عذرها ما غفرها

عندي تساوت هرجة العذر واللوم

هذيك ما ابغاها وذيك احتقرها

زله وعدت ما حدتني عن النوم

مرت سلام وبعد الله كدرها

انا اعتبرها كبوة حصان ويقوم

وانت اعتبرها زي ما تعتبرها

• قصيدة ينجرح قلب:

ينجرح قلب لكن ترتفع هامه

والله اني اموت ولا انحني راسي

لو رماني زماني وسط دوامه

العواصف شديده والجبل راسي

انقل الحزن وامشي منتصب قامه

قاسي الوقت لكني بعد قاسي

واسمع الحلم يصرخ لحظة اعدامه

رابط الجاش ماهز الخبر باسي

عزتي غاليه والناس سوامه

قلت ماطيع حتى تقطع انفاسي

زانت ايام عمري شانت ايامه

مارجيت العزاء من رحمة الناسي

من عجز لايدوس الهم بقدامه

لازم انه مع الايام ينداسي

يندمل جرح قلب ماتت احلامه

بس ماضن يبرا جرح الاحساسي

يوم صارت مابين القلب والهامه

ويش ابى بالحياه اليا انحنى راسي

• قصيدة كلك غلا:

كلك تعالي غلا والا أرجعي كلك

بعض الغلا منك مايستاهل الجيه

طالت وانا في رجا ليتك وياعلك

اوراق بالذاكره واوراق منسيه

مابل ثوبك مطر شوقي ولابلك

لوعلتك من سحاب الروح وسميه

ليه امشي الدرب دامه مايوصلك

تخاف رمضا الضياع اقدام رجليه

يابنت تو الهوى ماصرت انا خلك

للحين مازالت الصوره رماديه

ومازال بعض الغموض الشره يحتلك

وشلون انا اعشقك واحبك على النيه

اشوفك هناك قدامي ولا ادلك

صعب الكتابه لاصار الورق ميه

ان كان شمسك تساومني على ضلك

ماعاد ابي منك لاشمس ولافيه

إما تعالي لقلب فز لك كلك

والا اتركيني ما ابي لك بالهوى جيه

أشهر قصائد مساعد الرشيدي

فيما يلي أشهر قصائد مساعد الرشيدي:

• الطريق المظلم المهجور:

تخوفني مشاوير الطريق المظلم المهجور

وانا لا من ذكرتك قلت طولي يامشاويري

عزاي انك رجاي العذب لو كل الدروب عثور

وصلت اوما وصلت اعرفك ما انته منتظر غيري

حبيبي ..وكّل الله لاتحسبني بليد شعور

لو انت المستحيل الصعب ماابدي لك معاذيري

احبك .. لو يموت الحب وتصير القلوب قبور

اشوف الجرح يكبر وانت تكبر وسط تفكيري

احبك من هنا حتى طلوع الفجر حتى النور

صحيح انك قدر محتوم بس اجمل مقاديري

احد ربي يحطك له حبيب ومايجيه غرور ؟

انا ليه التفت للناس وعيونك جماهيري

هلا بك من قِدْمَك … لغرتك لي شعرك المنثور

هلا في كل شيٍ فيك وانت اغلي مساييري

ترى صدق الغلا يجبر حطام الخاطر المكسور

وانا مهما منحتك من غلاي اشعر بتقصيري

ولو طالت مشاوير الطريق المظلم المهجور

انا لا من ذكرتك قلت طولي يامشاويري

• قصيدة رماد الشوق:

ولع رماد الشوق يامعذبي نار

!!من كان يحلم باشتعال الرمادي ؟

ما كنت احسب انه يكون اللقا حار

لين التقينا واشبكتنا الأيادي

وقامت لنا الذكري تغني على الطار

تنساب بأسماعي نغم حب هادي

حسيت شي لفني مثل الإعصار

واستيقظت نشوة غلاك بفؤادي

أخذت لي سجه وأنا شبه منهار

بين الخيال وبين علمٍ وكادي

وفزيت يوم أنى تنبهت وش صار

مثل الذي توه صحي من رقادي

تغير الموقف بلا سابق إنذار

وغير المشاعر جت مشاعر جدادي

رديت لك عقب التجافي والانكار

وطويت صفحات الزعل والعنادي

وتبددت ذيك المبادي والافكار

ايه جنون افكار وايه مبادي

تراي انا مليتها لعبه النار

ما احد لعبها قبلنا واستفادي

من رد للجنه عقب صالى النار

حتى السموم يصير عنده برادي

• قصيدة الكنه:

عذب السجايا وعوده بأول الكنه .. متى تزين السوالف وآخذ علومه

وأسامحه عن خطاة الجرح والونه .. وأعاتبه لو يصد شوي والومه

وأذكره بأول المسفار حتى انه .. لامن تذكر زمان أول نسى نومه

يومن انه أقبل خدين الروح يومنه .. واقبلت اراعيه والقومه هي القومه

من يومها والحشا ماعاد له خنه .. إلا لصوته وميعاده وملزومه

عفري هنف للضلوع وجالهن حنه .. وأستانست له فياض القلب ورجومه

لبى جبينه لا أرتج الغطا كنه .. برق يصب الرفيف بكبد ديمومه

ما أقول شفته وشفت البيض يتلنه .. أقول شفته وشفت الشمس منجومه

ما أقول كن الجديل الليل لاكنه .. ليل خرعه الظلام وضيّع نجومه

ياقبلة الله هكا العنقود لامنه .. قام يتهجا شذا عطره ويشمومه

فيه أنتهى النور لا والله بدا منه .. فجر نعس بالوريد ونام بهدومه

ورد تفرعن حماره قلت أباكنه .. الى متى والحنايا منه مفطومه

فز وتطرق رطيبه قلت ماعنه .. بالم شيحه وريحانه وقيصومه

صد وتلعثم هديله في برد سنه .. ياقوم ذا النور يوم أنكت ياقومه

الله عطانيه والله يعطي الجنه .. واليا أستجد الهوى كل ومقسومه

• قصيدة مدلل زمانه:

من يرد العلم لمدلل زمانه

قبل يرتد العتب من رمش عينه

من يسلم لي عليه ومعه أمانه

يعتذر من سيد القلب وظنينه

الله اللي طوع العطر لبنانه

مانشت قرنفله عن ياسمينه

كنت اسولف للندى عن قحويانه

قبل يجمعه المطر بين اصبعينه

أه منه ومن غلاه ومن حنانه

ومن نهار ماجمع بيني وبينه

ماحلا تله لقلبي وسهيانه

كن ماقبله صباح ولامدينه

كل هذا بس من ضحكة ثمانه

قاد خفاقي معه قود الرهينه

الله اعلم لاتثنى خيزرانه

من نصدق قذلته والا جبينه

• قصيدة يمه كبرتي:

يمّه

كبرتي

وصرتي أحلى من العام

يـاحلو ضحكات التجاعيد

بيديك

أنا يمه ….. رهن طوعك

ومن يسراك إلى يمناك

ولو ما طاوعت كفي

أقص الكف لو تعصاك

أنا يمه ….. إذا ضاقت بي الدنيا

أجي وألقاك

أجي وأبكي على صدرك

ولا أرتاح إلين ألقاك

من ياخذ الدمعة لعينه ويعطين .

بسمة أمل

واعطيه في الناس همي

من خط لي في داخل القلب حرفين ..

.. حرفين عز وذاك يفداه دمي

ماغيرها تاجي

على الراس و العين ..

.. أمي

ولاأحد في الكون غير

أمي

من بعد ربي

لها كل التذلل والخضوع

طفل ربتني

وظلت بالليالي ساهرة

تحمل همومي

وتمسح من على وجهي الدموع

قدرها عندي كبير

فوق النجوم الظاهرة

وعشقى لها يبقى الأصل

ولغيرها يبقى فروع

مهما كبرت ابقى

بنظر قلبك صغير .. .

. والقاك في قلبي كبيرة كبيرة

و اذا جارت عليا المقادير ..

.. تبقين أهلي وظلي والذرى والعشيرة